Таҷлили Рӯзи Модар дар Донишкада

Дар Донишкадаи идоракунии давлатии назди Президенти Ҷумҳурии Тоҷикистон бахшида ба Рӯзи Модар чорабинии фарҳангӣ – маърифатӣ доир гардид.

Дар чорабинии мазкур собиқ ректорон, аз ҷумла Мунира Иноятова, Гавҳар Шарофзода ва Лутфия Абдухолиқзода, раёсати Донишкада устодон магистрантону донишҷӯён иштирок ва суханронӣ намуданд.

Абдухалил Ғафурзода, доктори илҳои ҳуқуқ, профессор, Ректори Донишкада, чорабиниро ҳусни ифтитоҳ бахшида, бо камоли эҳтиром ҳузури меҳмонони ин даргоҳи муқаддас, бунёдгузорони Донишкадаи идоракунии давлатӣ – Мунира Иноятова, Гавҳар Шарофзода ва Лутфия Абдулхолиқзодаро хайрамақдам гуфта, аз хизматҳои назарраси онҳо ёдрас гардид ва ба онҳо туҳфаҳои хотиравӣ тақдим намуд.

Хамзамон иброз дошт, ки сол ба сол дар сатҳи баланди давлатӣ ва бо шукӯҳу шаҳомати хосса таҷлил намудани Рӯзи Модар аз таваҷҷуҳу эҳтироми пайвастаи Пешвои муаззами миллат ва Ҳукумати Ҷумҳурии Тоҷикистон нисбат ба Зан – Модар гувоҳӣ медиҳад.

Зикр гардид, ки тайи солҳои соҳибистиқлолӣ Ҳукумати мамлакат бо мақсади дастгирии занону модарон ва баланд бардоштани мавқеи онҳо дар ҷомеа як силсила қарору қонунҳоро ба тасвиб расонд. Аз ҷумла, Фармони Президенти Ҷумҳурии Тоҷикистон «Дар бораи тадбирҳои баланд бардоштани мақоми зан дар ҷомеа» ба имзо расид, ки барои боз ҳам фаъолтар шудани занону бонувони мо такони ҷиддӣ бахшид. Минбаъд ба хотири дастгирии занон якчанд барнома ва стратегияҳои давлатӣ қабул гардид, ки онҳо ҷиҳати баланд бардоштани мавқеи занону духтарон дар ҷомеа нақши муҳим бозиданд.

Мунира Иноятова, зимни суханронӣ изҳор намуд, ки боиси хушнудӣ ва сарфарозист, ки сафи омӯзгорону кормандон дар Донишкада аз ҳисоби занону бонувони болаёқату кордон нисбати солҳои пешин бамаротиб афзудааст. Ин пеш аз ҳама таваҷҷуҳу ғамхориҳои доимии Пешвои муаззами миллат нисбат ба занону модарон аст. Мавсуф илми идоракунии давлатиро илми идоракунии инсон номида, онро вазифаи мураккаб донист ва таъкид намуд, ки занону модаронро мебояд дар баробари ғамхориву дастгириҳои Роҳбари давлат содиқонаву софдилона хизмат намоянд.

Гавҳар Шарозода, раиси Кумитаи забон ва истилоҳоти назди Ҳукумати Ҷумҳурии Тоҷикистон аз нақши зан дар хизмати давлатӣ, рисолати зан дар идоракунии давлатӣ, садоқату вафодорӣ, рафоқату меҳрубонии ин олиҳаи ҳусн ёдрас шуда, гуфт, ки Асосгузории сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар суханрониҳояшон бо эҳтирому самимияти баланд иброз медоранд, ки «бонувони тоҷик нигини пурҷилои тоҷи миллатанд». 

Лутфия Абдулхолиқзода, Сардори раёсати илму маърифати Дастгоҳи иҷроияи Президенти Ҷумҳурии Тоҷикистон нахуст модарон, устодон ва донишҷӯёнро бахшида ба Рӯзи модар ва баҳори оламафрӯз аз номи Роҳбари Дастгоҳи иҷроияи Президенти Ҷумҳурии Тоҷикистон Раҳмон Озода Эмомалӣ табрик намуд.

Зикр кард, ки имрӯз Зан – Модар дар ҳама соҳаҳои иқтисодию иҷтимоӣ, фарҳангию маърифатии кишвар сарбаландона кору фаъолият доранд. Ҳамин аст, ки Асосгузории сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёмашон ба Маҷлиси Олӣ (26. 12. 2018.) иброз доштанд:  «Зан модар аст. Яъне ягона мавҷудотест, ки инсонро ба дунё меоварад ва ба ӯ ҳаёт мебахшад. Модар – зан пайвандгари наслҳо, сарчашмаи меҳру муҳуббат ва нерубахши руҳу ҷон аст».

Инчунин дар чорабинӣ магистрантони хизмати давлатӣ – Мадина Бекназарова, Фарҳод Муминов дар мавзӯъҳои «Мақом ва манзалати зан дар ҷомеа» ва «Таърихи пайдоиши Рӯзи байналмилалии занон» баромад карда, маълумоти муфассал доданд.

Чорабинии идонаро ба муносибати Рӯзи Модар барномаи рангини ҳунарии овозхонони ансамбли «Сипар»-и Вазорати корҳои дохилӣ, донишҷӯён бо қироати шеър, суруд дар васфи Зан – Модар ва саҳнаи ҳаҷвӣ ҳусни хотима бахшид.

Leave a Reply

Your email address will not be published. Required fields are marked *